Eg arbeider ved treavdelinga i Hol, der eg fyrst og fremst legg til rette slik at dei tilsette får oppgåver som dei mestrar, og samstundes veks på. Det å utarbeide malar, jiggar og maskiner slik at fleire kan gjera oppgåvene mest mogeleg sjølvstendig, ser eg på som ein viktig del av arbeidet mitt.  Eg har kontakt med kundar og samarbeidsbedrifter, og ser til at me har passe mengde bestillingar og oppdrag.

Eg har lite formell utdanning, men har vore borti ulike bransjar opp igjennom åra. Etter 10 år som dyreutstoppar, 5 år ved Byggmakker, og 5 år i skuleverket som assistent for elevar med særskilde behov, har eg no vore på Vinn sidan 2006. 

Eg trivst i eit miljø der me fyrst og fremst ser etter mogelegheiter og ikkje begrensingar. Det å få arbeide med folk, og samstundes skapa noko med hendene, er for meg ein perfekt kombinasjon. Me er stolte av produkta me lagar, og det er viktig for meg at det me leverer er av god kvalitet. Arbeidstakarane eg jobbar med er fast tilsette på Vinn, og kan difor vera her over tid. Dette gjer det mogeleg å tenke langsiktig, noko eg likar svært godt. Det er veldig fint å sjå korleis det å vera i arbeid, få utfordingar og vera ein del av eit godt arbeidsmiljø verkar positivt på folk. 

Eg har vore Liverpool-fan sidan eg var 7 år, og det går aldri over. I periodar er eg ivrig amatør i Leveld Teaterlag. Likar meg godt i snikkerbua eller med modelljernbanen min på vinterkveldane. Om sumaren prøvar eg å sykle mest mogeleg, og kjeringi og eg har no vorte så gamle at det ikkje er flautt å bruke elsykkel. Med hus, hytte og hund går fritida fort.