Eg jobbar som tilretteleggjar i tilrettelagt arbeid for arbeidstakarar som jobbar på Vinn, eller som kombinera Vinn med arbeidspraksis ute i ekstern jobb. Som tilretteleggjar bidrar eg til at menneske med behov for tilrettelegging gis moglegheit for ein meiningsfull jobb, eigenutvikling og auka livskvalitet. Legg til rett saman med arbeidstakarar og arbeidsleiarar, arbeidsoppgåver som gir meistring, utvikling, sjølvstendigheit og glede. Saman med arbeidstakar lagar ein kvalifiseringsplanar som tek utgangspunkt i deira sine ønsker og mål for arbeidet. Følger opp arbeidstakarane på Vinn og ute i ekstern bedrift. Jobbar tett på arbeidstakarane ute i avdelingane, både i vaskeri, Jobbfrukt og ved- og treavdelinga.

Eg er utdanna førskulelærar med tilleggsutdanning i småskulepedagogikk og psykisk helsearbeid. Har sidan 1992- 2018, jobba i barnehage og skule, som styrar, pedagogisk leiar og kontaktlærar. I 2018 starta eg i jobben min på Vinn.

Det å jobbe på Vinn er både spennande og allsidig. Her får eg brukt mange sider av meg sjølv. Eg si ofte at eg har verdens beste jobb. Det er mange ting som motivera meg i jobben. Det å få ta del i den einskilde arbeidstakar sin utvikling gjennom ulike arbeidsoppgåver. Arbeidstakarane sin glede og gode humør på jobb, arbeidstakarane sin sjølvstendigheit i arbeidsoppgåvene og ikkje minst det målretta arbeidet dei gjer for å nå sine mål og draumar. På Vinn er vi-kjensla stor, her jobbar me saman gjennom ein heil arbeidsdag med produksjonsoppgåver. Eg valde å jobbe på Vinn, fordi det er ein meiningsfull og viktig jobb. Eg hadde også høyrt at det var ein god arbeidsplass med eit godt arbeidsmiljø. Vinn er ei framoverlent bedrift som følger med i tida, her er det spennande å jobbe.

På fritida likar eg å vera ute i naturen. Ta meg ein skitur eller fottur til fjells. Lesa bøker har alltid vore ein hobby eg har hatt. Det å kunne sette seg ned med ei god bok, gjerne krim, betyr mykje. Eg er vel det ein kan kalle ein lesehest. Familie og venner er viktig for meg, det å kunne møtast å ha det kjekt i lag.